Հայաստանը միշտ եղել է առաջատար բարձր տեխնոլոգիաների հետազոտության, մշակման ու արտադրության բնագավառում։ Հատկապես հետխորհրդային շրջանում Հայաստանի ՏՏ մասնագետների կենտրոնացումը համակարգչային ծրագրերի մշակման, ՏՏ ծառայությունների և արդյունաբերական հաշվարկների վրա գրավեցին օտարերկրյա ներդրումներ բնագավառ։ ՏՏ հատվածը դարձավ Հայաստանի տնտեսության մեջ առավել արագ զարգացող հատվածը, որ վերջին տասնամյակում ընդլայնվում է միջինը տարեկան 27%-ով (Աղբյուրը՝ «Ձեռնարկությունների ինկուբատոր» հիմնադրամ, Հայաստանի ՏՀՏ հատվածի հետազոտության հաշվետվություն)։

Ոգևորված այս փաստերով ու թվերով, մենք (մի խումբ ՏՏ մասնագետներ Գեղարքունիքի մարզկենտրոն Գավառում) հիմնեցինք ITM տեխնոլոգիաների նորարարական կենտրոնը՝ նպատակ ունենալով զարգացնել ՏՏ հատվածը տարածաշրջանում ռոբոտաշինության ու արհեստական բանականության (ԱԲ) համակարգերի վրա շեշտը դնելու միջոցով։ Կենտրոնում ներկայումս ներգրավված են ավելի քան 20 երիտասարդ, որոնք ունեն միկրոհսկիչ սարքերի ու սխեմաների նախագծման մեծ ներուժ և պատրաստ են ներդնել իրենց ջանքերն այս բնագավառներում։

Մենք հավատում ենք, որ ՏՏ-ն կլուծի մի շարք խնդիրներ և կհեշտացնի մարդկանց կյանքը, այնպես որ ծրագրի հիմնական նպատակն է առանձնացնել որևէ կարևորագույն խնդիր և նախագծել լուծումներ միկրոհսկիչ սարքերի ծրագրավորման ու սխեմաների դիզայնի միջոցով։ Մեր նպատակն է նաև սովորել, թե ինչպես են կիրառվում ու վերարտադրվում ուղեղ-համակարգչային արտերեսները (ինտերֆեյս)։

Ծրագրի բարեհաջող իրականացման արդյունքում՝

• Կստեղծվի ռոբոտ, սխեմա կամ սարք, որը կօգնի օգտատերերին լուծել մի ինչ-որ լուրջ տեխնիկական խնդիր իրենց առօրյա կյանքում։
• ITM տեխնոլոգիաների նորարարական կենտրոնի ուսանողները, ինչպես նաև  Գեղարքունիքի մարզի ուրիշ ընկերությունների ՏՏ մասնագետները կընդարձակեն իրենց գիտելիքները ռոբոտաշինության և արհեստական բանականության համակարգի նախագծման (դիզայն) ու մշակման բնագավառում։